VolverA titular de Vivenda e Planificación de Infraestruturas interveu no Parlamento de Galicia
A conselleira M. Allegue defende a protección indefinida e permanente de todas as vivendas de promoción pública do IGVS e Vipugal
Allegue sinalou que a Xunta ten en marcha a metade das 4.000 vivendas comprometidas nesta lexislatura para acadar o reto de duplicar o parque público residencial ata as 8.000
Remarcou que Galicia é pioneira en habilitar solo onde poder construír vivenda, ao abeiro da Estratexia de desenvolvemento de solo residencial impulsada pola Xunta
Puxo en valor as medidas da Xunta para brindar aos galegos máis oportunidades para acadar fogares dignos, de calidade e a prezos accesibles
Avanzou a publicación mañá no DOG da convocatoria do programa Fogar Vivo, con incentivos para que os propietarios reformen as vivendas e as poñan en alugueiro accesible
Allegue detallou que esta iniciativa tamén incluirá o financiamento de seguros multirrisco e de impago para os propietarios
Destacou que a Xunta aposta pola dinamización do mercado de alugueiro, construíndo vivendas neste réxime e reservando polo menos o 40% a menores de 36 anos, así como o 25% para venda
- Compartir
-
-
-
Santiago de Compostela, 9 de xullo de 2025
A conselleira María M. Allegue defendeu hoxe no Parlamento a duración indefinida e permanente das vivendas de promoción pública (VPP).
A titular de Vivenda e Planificación de Infraestruturas lembrou que foi o actual Goberno galego o que modificou a Lei de Vivenda autonómica para blindar que as vivendas públicas sexan sempre protexidas, tanto as construídas polo IGVS, como as promovidas pola sociedade Vipugal, así como todas as vivendas protexidas de promoción privada que se constrúan en solo desenvolvido, urbanizado por promotor público. Igualmente se blinda esta condición para as vivendas que o IGVS adquira de particulares, e tamén de todas as adquiridas da Sareb.
Fixo fincapé en que, tanto a vivenda coma a propiedade, son dereitos constitucionais que a Xunta quere salvagardar e nesa materia prioritaria seguirá traballando.
Na súa intervención, Allegue salientou o esforzo do Executivo galego para incrementar a oferta de vivendas accesibles e, neste sentido, avanzou tamén que a Xunta publicará mañá no DOG a convocatoria do novo programa Fogar Vivo, con incentivos para que os propietarios poidan reformar as súas vivendas, aboar seguros multirrisco e de impago e poñer as vivendas en alugueiro accesible.
A conselleira indicou que a Xunta traballa na dinamización do mercado de alugueiro, polo que se están a construír VPP neste réxime e polo menos o 40% serán ofrecidas en alugueiro tamén a menores de 36 anos e o 25% para venda.
Ademais o Goberno galego aprobou incentivos fiscais que estimulen a promoción de vivenda protexida en alugueiro.
Concretou que para dinamizar o mercado de alugueiro ten que facerse sempre “sen criminalizar aos propietarios e dotando as medidas de seguridade xurídica”.
Puxo en valor as medidas da Xunta para brindar aos galegos máis oportunidades para acadar fogares dignos, de calidade e a prezos accesibles.
Neste sentido, destacou que o Goberno galego xa ten en marcha a metade das 4.000 vivendas para acadar o reto de duplicar o parque público residencial ata as 8.000.
Subliñou que a Sociedade Pública de Vivenda, Vipugal, creada polo Goberno galego, xa traballa a pleno rendemento.
Destacou que Galicia é unha comunidade pioneira en España en habilitar solo onde poder construír vivenda. Urbanizarase solo gracias á Estratexia de desenvolvemento de solo residencial e tómase a iniciativa que permitirá dispor de solo urbano onde poder construír vivenda pública, libre e protexida.
Na actualidade, a Xunta colabora na cesión ou permuta de solos onde construír máis vivenda pública con concellos como Lalín, Teo, A Estrada, Lugo, A Coruña, Ames ou Vilagarcía. A este respecto, criticou que municipios como Santiago, cun Goberno do BNG, é o único que aínda non cedeu solo.