VolverA Xunta autoriza a adxudicación da redacción dos proxectos para a construción de 101 novas vivendas de promoción pública en San Paio de Navia (Vigo)
O Consello de Administración da Sociedade de Vivenda Pública de Galicia (Vipugal) autorizou hoxe a adxudicación de dous contratos por importe de máis de 930.000 euros
Construiranse 75 vivendas nas parcelas M-IIIB-3 e M-IIIB-4 e 26 vivendas na parcela M-IIIB-14
- Compartir
-
-
-
Santiago de Compostela, 4 de xullo de 2025
O Consello de Administración da Sociedade de Vivenda Pública de Galicia (Vipugal) autorizou a adxudicación dos contratos para a redacción dos proxectos e dirección de obra de dous inmobles de 26 e 75 vivendas de promoción pública en San Paio de Navia, Vigo.
A redacción do proxecto para a construción de 75 vivendas nas parcelas M-IIIB-3 e M-IIIB-4 de San Paio de Navia encargarase a Fernández Carballada Asociados, S.L.P., por importe de 678.478,14 euros.
Tamén se adxudicará o contrato correspondente á parcela M-IIIB-14 de San Paio de Navia, na que se construirán 26 vivendas de promoción pública. Neste caso a redacción do proxecto e dirección de obra corresponderá á UTE Navia 14 (Villacé y Cominges S.L.P., Juan Pons Herrera e Lucas Gándara Álvarez). O importe do contrato será de 252.122,36 euros.
En ambos casos os redactores terán un prazo de dous meses para a presentación do proxecto básico e tres meses máis para o de execución, aínda que o contrato terá unha duración superior ao incluír tamén a dirección da obra.
A Xunta continúa avanzando no compromiso de duplicar o parque de vivenda pública na actual lexislatura coa incorporación ao mesmo de 4.000 novas vivendas, tendo na actualidade en execución máis de 2.200.