Portal IGVS

A Coruña, 19 de xuño de 2025

A Xunta asina co Concello da Coruña a cesión de 4 parcelas e confirma que xa ten en marcha as licitacións da redacción dos proxectos para construír un cento de vivendas públicas, cun investimento autonómico estimado de preto de 19M€.

Así o avanzou hoxe a conselleira de Vivenda e Planificación de Infraestruturas, María Martínez Allegue, que xunto á delegada territorial da Xunta na Coruña, Belén do Campo, e o secretario xeral de Vivenda e Urbanismo, Heriberto García Porto, firmou co Concello da Coruña o citado acordo.

Allegue detallou que están publicadas no perfil do contratante a licitación da redacción dos proxectos das 58 VPP previstas na parcela dos Rosais; das 11 en Rei Abdullah, preto da praza Porticada; e hoxe súmase a licitación para 30 máis nas dúas parcelas de Pedro Fernández.

Remarcou que estes fogares se engaden ás 104 vivendas que están en marcha en Xuxán, nas que o Goberno galego leva investido 23,4M€.

A Xunta tamén está a impulsar o desenvolvemento de solo residencial  na Coruña, concretamente no ámbito de Monte Mero, para 4.310 vivendas, o 80% delas protexidas.

Colaboración entre administracións

María Martínez Allegue subliñou que o Goberno galego, ademais de construír vivenda en solos de titularidade autonómica, tamén está a avanzar cara á construción de fogares en parcelas de titularidade municipal que ceden á Xunta, como neste caso na Coruña.

Fixo fincapé na importancia de sumar esforzos entre todas as administracións para dar resposta a unha das principais preocupacións dos galegos, que é o acceso á vivenda.

Cómpre lembrar que a Xunta está a avanzar nesa liña de colaboración cos municipios para facilitar solo e habilitar novas promocións, pois xa está acordada a cesión de parcelas cos concellos de Pontevedra, Lugo, Teo, Lalín e A Estrada. Ademais, progresan as xestións con concellos como Ames, Sanxenxo, Carballo, Narón, Vilagarcía de Arousa, San Cibrao das Viñas ou Bueu.

O Goberno galego está a poñer ao servizo dos concellos ferramentas útiles coma o novo programa de oferta de Solos co fin de axudarlles a sacar a concurso as súas parcelas coa axuda técnica do IGVS, e facilitar así a construción de vivenda protexida en máis localidades.

O Executivo autonómico tamén ten abertos os fondos de cooperación para conceder préstamos sen xuros aos concellos, para rehabilitar o seu parque de vivendas, e como novidade, un fondo de 10M€ para a construción de fogares protexidos ou para adquirir parcelas para construción de vivendas protexidas.

A Xunta segue traballando para acadar o reto de duplicar o parque público de vivenda nesta lexislatura. O obxectivo é ter en 2028, 4.000 máis, e xa hai máis 2.200 en diferentes fases de execución.