Portal IGVS

Santiago de Compostela, 16 de xuño de 2025

Hoxe constituíuse o xurado do concurso de proxectos para a ordenación, desenvolvemento e urbanización do ámbito da UI-8 do Barrio da Tinería en Lugo, para a rehabilitación do Pazo de Dona Urraca e edificios contiguos e para a construción das novas edificacións neste  ámbito.

O xurado está integrado por Ricardo Valencia, director técnico de edificación e calidade do IGVS; Susana Orgaz e Vanesa Cotoya, arquitectas da oficina técnica de edificación do IGVS; Patricia B. Vázquez Mille, do Concello de Lugo; María Elenea Parajó, da Consellería de Cultura, Lingua e Xuventude; Sagrario Roel Alonso, da Consellería de Facenda e Administración Pública; Juan Roberto Barcia, asesor xurídico do IGVS; e José Luis Montero, do servizo de contratación do IGVS, que actuará como secretario.

O obxectivo é avaliar as 17 propostas presentadas e seleccionar os tres galardoados, que recibirán premios por importe de 12.000, 10.000 e 8.000 euros respectivamente.

Á persoa galardoada co primeiro premio seranlle adxudicados os contratos de redacción do plan especial de ordenación do ámbito da UI-8 e do proxecto de rehabilitación do Pazo de Dona Urraca e das edificacións da rúa Miño 19 e 21 e da rúa Falcón 16 e 18. Tamén lle corresponderán a redacción do proxecto urbanización da UI-8 e contorno do Pazo de Dona Urraca e dos proxectos das novas edificacións incluídas na UI-8.

O importe total destes contratos, incluído o importe do primeiro premio, será de 489.144,02 euros, IVE incluído.

Os proxectos indicados permitirán poñer en valor o espazo da UI-8 así como a rehabilitación do Pazo de Dona Urraca e a consecución de arredor de 16 vivendas, das que 6 serán rehabilitadas e o resto obra nova.