Portal IGVS

Santiago de Compostela, 21 de maio de 2025

A conselleira de Vivenda e Planificación de Infraestruturas, María M. Allegue, exixiu hoxe no Parlamento que, como fai a Xunta, o Ministerio e a ICO garantan o carácter social das vivendas protexidas de Xuxán, na Coruña, e que as modificacións nos préstamos ICO non desvirtúen ese compromiso.

Allegue sinalou que a Xunta remitiu 4 cartas ao ministerio de Vivenda e Axenda Urbana, unha asinada polo director do IGVS, e 3 máis asinadas pola conselleira, para pedir explicacións sobre as modificacións no préstamo que o Ministerio conveniou co Instituto de Crédito Oficial (ICO) e que obrigaría aos socios da cooperativa Galivivienda a aportar unha cota que desvirtuaría o carácter social das vivendas protexidas. Lamentou que a día de hoxe o Goberno galego segue agardando pola convocatoria dunha reunión por parte do Ministerio e na que estean presentes os cooperativistas.

Lembrou que a cooperativa Galivivenda, a partir dun concurso público da Xunta, resultou adxudicataria para construír vivenda protexida en Xuxán. A cooperativa solicitou financiamento a través dos préstamos ICO, creados especificamente polo Ministerio no pasado xullo para a promoción de vivendas en réxime de alugueiro accesible. Non obstante, o problema vén cando o ICO mudou as condicións, pois pide agora que os cooperativistas acheguen en 10 anos o importe garantía que inicialmente estaba repartida en 36 anualidades.

A conselleira recordou que o Ministerio conta con 4.000 millóns de euros de fondos europeos e outros 2.000 millóns máis de fondos estatais para a promoción de vivenda protexida en réxime de alugueiro e “Galicia non recibiu nin un só euro”.

Pese a esta situación, Allegue reiterou que este problema non ten nada que ver cunha suba das rendas ás familias, pois os prezos da vivenda protexida están taxados por normativa autonómica e que se sitúa concretamente, nesta zona en 4,85€/m2.

Concluíu solicitando a unión de todas as administracións para acadar unha resposta precisa, urxente e esperanzadora para os cooperativistas de Xuxán. Chamou á suma de esforzos por parte das administracións para que esta “trampa” do ICO, que acurtou os prazos dos pagos inicialmente previstos, non afecte á cooperativa Galivivenda e tampouco a outras en España.