Portal IGVS

Pontevedra, 19 de maio de 2025

O presidente da Xunta, Alfonso Rueda, participou hoxe en Pontevedra no acto de sinatura da cesión gratuíta de tres parcelas municipais que permitirán construír 118 novas vivendas de promoción pública. O acto simboliza, segundo subliñou, a importancia da colaboración institucional e a prioridade absoluta que representa a política de vivenda para o Goberno galego.

Rueda agradeceu a disposición do alcalde de Pontevedra, Miguel Anxo Fernández Lores, así como de todo o equipo municipal, para avanzar conxuntamente na creación de novos fogares protexidos. Un obxectivo que, ao seu xuízo, transcende partidos, lexislaturas e intereses puntuais.

O presidente sinalou que o acceso a unha vivenda digna e asumible constitúe un dos grandes desafíos sociais da actualidade, afectando a mozos, familias traballadoras, maiores e persoas que queren residir no rural ou no centro das idades. Así, defendeu que as políticas de vivenda están no centro da acción do Executivo autonómico, ao nivel doutras políticas esenciais como a sanidade ou a educación.

Neste senso, o titular do Goberno galego reiterou que  Xunta marcou como obxectivo de lexislatura duplicar o parque público de vivenda pasando de 4.000 a 8.000 vivendas protexidas, e detallou os medios postos ao servizo deste reto: máis de 2.200 vivendas en execución ou tramitación, a creación da Sociedade Pública de Vivenda de Galicia (Vipugal), e un orzamento de 240 millóns de euros para 2025, dos que máis de 100 millóns están destinados á nova construción.

As novas promocións anunciadas en Pontevedra (54 en Valdecorvos, 53 na rúa Ernestina Otero e 11 na rúa As Devesas) veñen complementar un conxunto de actuacións que inclúe xa 132 vivendas entregadas e 182 en marcha, para un total de 432 vivendas públicas neste ámbito urbano. De feito, hoxe mesmo publícase a licitación da dirección de obra e proxecto para a construción de Valdecorvos, que inclúe 54 vivendas por un valor estimado de 10,3 millóns de euros.

Rueda insistiu en que o modelo galego de política de vivenda baséase na mobilización de solo público, na rehabilitación de vivendas existentes, e na posta en marcha de programas como o que permitirá destinar ata 16.000 euros por vivenda baleira para a súa adecuación e saída ao mercado de alugueiro.

O presidente destacou que a vivenda non é unha política asistencial, senón un motor de futuro, de desenvolvemento económico e de fixación de poboación, e defendeu a necesidade de contar cun novo Pacto Estatal de Vivenda que recoñeza o papel das Comunidades e respecte a súa capacidade para aplicar medidas adaptadas á realidade de cada territorio.

Na recta final da súa intervención, Rueda afirmou que a vivenda é unha prioridade firme, sostida e estratéxica para a Xunta, e que seguirá traballando da man de todos os concellos que compartan esta visión.