VolverA conselleira de Vivenda e Planificación de Infraestruturas, María M. Allegue, visitou dous inmobles en Cualedro rehabilitados con achegas da Xunta
M. Allegue entrega as chaves de 5 vivendas renovadas en Cualedro co apoio da Xunta
Allegue pon en valor o traballo do Concello de Cualedro e a súa cooperación co Goberno galego para ampliar o parque público residencial
A conselleira puxo en valor o programa de axudas á rehabilitación de edificacións e vivendas de titularidade municipal, tras visitar dous inmobles renovados
A titular de Vivenda e Planificación de Infraestruturas anima aos concellos de menos de 30.000 habitantes a que soliciten esta liña de achegas ás que a Xunta destina 1,8M€
- Compartir
-
-
-
Cualedro (Ourense), 15 de maio de 2025
A conselleira de Vivenda e Planificación de Infraestruturas, María M. Allegue, visitou o concello ourensán de Cualedro onde fixo entrega das chaves de 5 vivendas renovadas ao abeiro das axudas á rehabilitación de edificacións e vivendas de titularidade municipal da Xunta, actuacións que contaron tamén coa participación da Deputación de Ourense. A achega total do Goberno galego nos inmobles que albergan estes fogares ascende a 300.000€. As familias adxudicatarias disporán dunha vivenda en réxime de alugueiro accesible.
A titular de Vivenda cualificou de “moi emotivo o acto”, honrando a memoria dos antigos propietarios que doaron ao Concello un dos inmobles renovados que visitou e que alberga 2 das vivendas entregadas. Neste sentido, a conselleira descubriu unha placa conmemorativa no edificio, para lembrar a xenerosidade desta familia.
M. Allegue destacou que Cualedro “é un gran exemplo de cooperación entre administración local e Xunta de Galicia” e salientou que este tipo de actuacións “revitalizan o noso rural, recuperan espazos e, sobre todo, ofrecen oportunidades reais de vida fixando poboación”.
A conselleira recordou que as axudas á rehabilitación de edificacións e vivendas de titularidade municipal con destino ao alugueiro social está aberta e os concellos poden solicitala ata o 3 de xuño. O orzamento para este programa ascende a 1.850.000€ e esténdense agora aos concellos que conten con menos de 30.000 habitantes, cando antes se limitaba aos de menos de 20.000.
Estas axudas autonómicas poden chegar ao 95% do orzamento das obras, ata os 50.000€ por vivenda rehabilitada, ata 55.000 no caso de que se atopen nun conxunto histórico ou nun ámbito da Ribeira Sacra ou dos Camiños de Santiago, como é o caso de Cualedro, e a 57.000 se a vivenda está nunha área Rexurbe.