Portal IGVS

Ferrol, 15 de maio de 2025

A Xunta concedeu o pasado ano 292.618 euros en axudas a  103 particulares do ámbito da Delegación Territorial de Ferrol para actuacións de mellora da eficiencia enerxética en vivendas. A delegada territorial, Martina Aneiros, acompañada da directora territorial da Consellería de Vivenda e Planificación de Infraestruturas, Begoña Freire, puido comprobar esta mañá os traballos realizados nunha vivenda de Covas, en Ferrol, para a substitución de ventás e portas.

Segundo explicou Aneiros, esta liña de axudas está destinada á mellora enerxética de vivendas de forma individual, tanto se son unifamiliares como se forman parte de inmobles residenciais colectivos. “Trátase de axudas apropiadas para a realización de obras de menor entidade como o cambio da carpintería exterior e para as que se estable como único requisito obter unha redución da demanda enerxética de polo menos un 7% no caso de calefacción ou refrixeración ou unha redución do consumo de enerxía primaria non renovable de, a lo menos, un 30%”, explicou.

Durante a visita a delegada territorial lembrou que está aberta a convocatoria de 2025 e animou ás persoas físicas propietarias, arrendatarias ou usufrutuarias das vivendas ás que van dirixidas estas subvencións a solicitalas antes do 8 de xullo.

A convocatoria, de carácter plurianual, conta cun orzamento de preto de 2,2 M€ e o importe a percibir será do 40% do custo subvencionable, a partir dun investimento de 1.000 euros e cun límite máximo de 3.000 euros por axuda.

Esta liña de subvencións que o Instituto Galego de Vivenda e Solo (IGVS) convoca por cuarto ano consecutivo, está financiada con fondos europeos del programa Next Generation UE.