Portal IGVS

Santiago de Compostela 2 de abril de 2024

A Xunta de Galicia amosou a súa disposición a colaborar co concello de Tomiño no obxectivo de dar resposta ás necesidades de vivenda que se presenten no concello.

Con tal fin, o secretario xeral de Vivenda e Urbanismo, Heriberto García Porto, mantivo hoxe unha xuntanza coa alcaldesa de Tomiño, Sandra González Álvarez, na que lle explicou as distintas liñas de axudas públicas ás que se pode acoller o concello.

García Porto indicou que os concellos de menos de 30.000 habitantes, como é o caso de Tomiño, poden acceder ás axudas de rehabilitación de vivendas de titularidade municipal, que acadan o 95 por cento do custe. Ademais, poden empregar os préstamos do fondo de cooperación cos concellos para financiar, sen xuros, a diferenza entre o investimento necesario e a axuda da Xunta, así como para adquirir inmobles para rehabilitar.

Ademais, a Xunta ofrece o programa de mobilización de vivendas para alugueiro no que a Xunta ofrece aos propietarios das vivendas seguros gratuítos de impagos e multirrisco do fogar, así como axudas de ata 8.000 euros para a mellora das vivendas. Este programa é xestionado polos concellos coa colaboración da Xunta.

O secretario xeral de Vivenda e Urbanismo tamén lle explicou á alcaldesa os programas de axudas para a promoción de vivendas para alugueiro e o programa de áreas de rehabilitación integral, destinado á mellora das vivendas e o entorno dos ámbitos de ditas áreas, cuxa declaración debe ser solicitada polo concello.