VolverA conselleira María M. Allegue achega ao alumnado do IES Rosalía de Castro as actuacións da Xunta en materia de vivenda
- Compartir
-
-
-
Santiago de Compostela, 28 de marzo de 2025
A conselleira de Vivenda e Planificación de Infraestruturas, María Martínez Allegue, participou hoxe nunha entrevista co alumnado do IES Rosalía de Castro, en Santiago de Compostela, na que explicou as actuacións da Xunta en materia de vivenda.
Na entrevista, que tivo lugar nas instalacións do centro compostelán, a conselleira respondeu ás preguntas e inquedanzas dos rapaces de 1º de ESO. Neste sentido, Allegue subliñou o obxectivo prioritario de facilitar o acceso da cidadanía a un fogar.
A conselleira trasladou de xeito didáctico as medidas que está a desenvolver a Xunta neste ámbito, como a construción de vivenda pública, a rehabilitación, o desenvolvemento de solo residencial ou a activación de axudas á compra ou ao alugueiro.
María M. Allegue fixo fincapé especialmente na mocidade, colectivo ao que o Goberno galego está a dirixir medidas específicas no eido da vivenda. Lembrou que os menores de 36 anos teñen á súa disposición axudas para mercar o seu primeiro fogar en concellos pequenos ou en centros históricos. Ademais a Xunta está a impulsar a construción de aloxamentos compartidos en cidades como Santiago, co fin de favorecer a emancipación dos máis novos.