VolverA conselleira de Vivenda e Planificación de Infraestruturas, María Martínez Allegue, visitou varias vivendas rehabilitadas con estas achegas en A Veiga
Allegue cualifica de exemplar o traballo da Veiga en materia de vivenda, modelo de cooperación entre a Xunta e a administración local
Allegue destaca o papel das pequenas corporacións do rural galego, que “grazas a esforzo e tenacidade”, marcan a diferencia para a veciñanza
A Xunta fixo un investimento de preto de 700.000 € ao longo dos últimos anos en A Veiga a través da liña de achegas destinadas á rehabilitación de inmobles de titularidade municipal, co que se acadaron 17 vivendas para alugueiro accesible
A conselleira destacou o esforzo do Concello da Veiga por recuperar antigas vivendas de mestres a través destas axudas, tras visitar varios inmobles en Castromarigo e Castromao
- Compartir
-
-
-
A Veiga (Ourense), 21 de marzo de 2025
A conselleira de Vivenda e Planificación de Infraestruturas, María Martínez Allegue, visitou varios inmobles da Veiga nas zonas de Castromarigo e Castromao, onde puido ver o resultado da rehabilitación de varias vivendas renovadas grazas ás achegas da Xunta destinadas a inmobles de titularidade municipal. Allegue cualificou de exemplar o traballo do concello no eido da vivenda, “un modelo a seguir de cooperación entre administración local e Goberno galego”.
Allegue puxo en valor os resultados da xestión do executivo, acadando 17 vivendas públicas para a veciñanza destinadas a alugueiro accesible, impulsadas coa liña de achegas para inmobles de titularidade municipal, cun investimento total da Xunta de preto de 700.000 € dende o 2019.
A titular de Vivenda e Planificación de Infraestruturas subliñou que “ás veces as grandes cidades lévanse os grandes titulares, pero o esforzo, a tenacidade e a constancia dos alcaldes e as corporacións máis pequenas, supoñen a diferencia para a veciñanza. Con estas achegas, non só creamos novos fogares, novas vivendas públicas, senón que tamén axudamos a asentar poboación nos nosos fermosos concellos do rural”.
Allegue recordou que a liña de axudas para a rehabilitación de inmobles de titularidade municipal está aberta e os concellos poden solicitala ata o 3 de xuño. O orzamento para este programa ascende a 1.850.000 € ata 2026 e esténdense agora aos concellos que conten con menos de 30.000 habitantes, cando antes se limitaba aos de menos de 20.000.