VolverA conselleira de Vivenda e Planificación de Infraestruturas, María Martínez Allegue, xunto ao delegado territorial da Xunta, Manuel Pardo, supervisou o arranque dos traballos
A Xunta inicia as obras de 64 vivendas públicas en Cambedo de Raia, en Ourense, cun investimento de 13,6M€
Allegue destacou que a previsión é que as obras, cun prazo de 16 meses, estean rematadas no terceiro trimestre do vindeiro 2026
As vivendas desta nova promoción serán adxudicadas en réxime de alugueiro accesible, coa reserva de ao menos un 40% para menores de 36 anos
A conselleira subliñou que a Xunta tamén está a traballar para facilitar solo para máis de 600 vivendas no ámbito Escorial-Vinteún
Remarcou a aposta pola rehabilitación, no marco do programa Rexurbe, pois a Xunta dispón de 8 inmobles na cidade, coa previsión de chegar aos 18 fogares e 3 locais
Salientou a necesaria colaboración entre o sector público e privado para dinamizar o mercado da vivenda a través da construción
Indicou que a Xunta vén de recibir o documento do PXOM, para a emisión do informe previo á sua posterior aprobación definitiva por parte do Concello
- Compartir
-
-
-
Ourense, 18 de marzo de 2025
A Xunta vén de iniciar as obras de construción de 64 novas vivendas de promoción pública en Cambedo de Raia, en Ourense, cun investimento de 13,6M€.
A conselleira de Vivenda e Planificación de Infraestruturas, María M. Allegue, xunto ao delegado territorial da Xunta en Ourense, Manuel Pardo, supervisou hoxe o comezo dos traballos e subliñou que se prevé que estean finalizados no terceiro trimestre do vindeiro 2026.
A nova promoción, que estará formada por catro bloques, sitúase en tres parcelas que a Xunta mercara á Sareb por máis dun millón de euros. E as 64 vivendas (de 2, 3 e 4 dormitorios), unha vez construídas, serán adxudicadas en réxime de alugueiro accesible, coa reserva de ao menos un 40% para menores de 36 anos. Do investimento das obras, que supera os 13,6M€, o 76% son fondos aportados pola Xunta e o restante 24% corresponde a fondos europeos.
A conselleira destacou a necesaria colaboración entre o sector público e privado para dinamizar o mercado da vivenda a través da construción.
Lembrou que a Xunta tamén está a traballar para facilitar solo para máis de 1.600 vivendas no ámbito Escorial-Vinteún. Xa se recibiron 3 ofertas para a licitación do Proxecto de Interese Autonómico nesta área.
Ademais remarcou a aposta pola rehabilitación, no marco do programa Rexurbe, pois a Xunta dispón de 8 inmobles na cidade, coa previsión de chegar aos 18 fogares e 3 locais.
Recordou que a semana pasada o Consello da Xunta aprobou a Área Rexurbe en Ourense, unha ferramenta que permitirá seguir fomentando a rehabilitación de edificios e de vivendas no casco histórico. Detallou que agora o Concello debe redactar un plan de dinamización e habilitar un centro de xestión da área Rexurbe, para comenzar a traballar. Isto suporá tamén o incremento de axudas para a compra de vivenda na Área Rexurbe.
PXOM Ourense
Por outra parte, a conselleira tamén indicou que a Xunta vén de recibir o documento do PXOM, para a emisión do informe previo á sua posterior aprobación definitiva por parte do Concello.
Dende a Xunta de Galicia analizarase a documentación e realizaranse os requerimentos, que no seu caso sexan precisos.
Allegue destacou "que os técnicos da consellería xa están a analizar a documentación para poder remitir ao concello ourensán o antes posible".