VolverA Xunta recibiu no primeiro día 3.186 solicitudes para o Bono Alugueiro Mocidade
Estas cifras, actualizadas ás 19 horas de hoxe, rexistráronse no primeiro día do prazo para presentar as citadas solicitudes
A conselleira de Vivenda, María M. Allegue, lamentou a dotación insuficiente de fondos estatais para este bono, xa que a partida de 11,4M€ asignados a Galicia é para dous anos
Lembrou que que a Xunta ten reclamado ao Goberno central máis fondos para outros programas de axudas e apuntou que do Orzamento do Instituto Galego da Vivenda e Solo para 2025 tan só o 10% se corresponde con fondos estatais
O Goberno galego mantén aberto o prazo de solicitudes para as axudas á adquisición de vivenda, nas tres liñas: para menores de 36 anos en concellos de menos de 10.000 habitantes, para centros históricos e para mercar vivenda protexida
- Compartir
-
-
-
Santiago de Compostela, 28 de febreiro de 2025
A Xunta recibiu no primeiro día de prazo, na sede electrónica do Instituto Galego de Vivenda e Solo (IGVS), un total de 3.186 solicitudes para o Bono Alugueiro Mocidade.
Estas cifras, actualizadas ás 19 horas de hoxe, rexistráronse no primeiro día do prazo para presentar as citadas solicitudes para esta axuda para alugueiro, dirixida a menores de 36 anos e que acada os 250€ mensuais.
Os técnicos do IGVS avaliarán, a partir de agora, cada solicitude para comprobar o cumprimento dos requisitos e avanzar na tramitación.
A conselleira de Vivenda e Planificación de Infraestruturas, María Martínez Allegue, durante unhas declaracións hoxe nunha visita en Vigo, volveu lamentar que os fondos para este bono non son suficientes, xa que ademais se trata dunha partida para dous anos.
Nesta última convocatoria do bono, o Ministerio de Vivenda asignou a Galicia preto de 11,4M€ para este 2025 e o 2026, unha cifra “que claramente resulta insuficiente”, como criticou a conselleira, que lembrou que a Xunta ten reclamado ao Goberno central máis fondos para outros programas de axudas do Plan Estatal.
Allegue lembrou ademais que do Orzamento do Instituto Galego da Vivenda e Solo para este ano 2025, tan só o 10% se corresponde con fondos estatais.
Por outra banda, a conselleira recordou que aínda continúa aberto o prazo para solicitar as axudas da Xunta para a compra de vivendas, nas tres liñas: a dirixida a mozos menores de 36 anos residentes en concellos de menos de 10.000 habitantes, para compra de vivenda en centros históricos e as destinadas a mercar vivenda protexida, cuxa contía pode alcanzar os 20.000 € que ademais son compatibles co Aval mozo, que cubre o 20% da hipoteca.