Portal IGVS

A Xunta de Galicia segue a colaborar co Consello da Avogacía Galega co fin de crear as canles de información necesarias para:

• Procurar que persoas en situación de desamparo non perdan a súa vivenda habitual ou, no seu caso, poidan acollerse aos programas existentes en materia de acceso á vivenda.
• Posibilitar que as persoas físicas propietarias ou usufrutuarias de vivendas que sexan ocupadas ilegalmente saiban como actuar nestas situacións e,
• Para a implantación do procedemento de solución de controversias que eviten litixios.

O Instituto Galego da Vivenda e Solo asinou un convenio co Consello da Avogacía Galega e como froito deste, ponse a disposición da cidadanía asesoramento e orientación gratuítos nas seguintes materias:

• Aspectos referidos a trámites de carácter administrativo e xudicial no ámbito relacionado cos dereitos e obrigas das persoas en risco de perder a súa vivenda como consecuencia dun procedemento de execución hipotecaria polo impago da renda de alugueiro ou por calquera outra circunstancia imprevista ou sobrevida, sempre que esta vivenda constitúa o seu domicilio habitual e permanente.
• Sobre a existencia do Programa de atención ás persoas en risco de desafiuzamento.
• Ás persoas físicas propietarias ou usufrutuarias que se vexan afectadas por intrusión non consentida en vivendas.

Os servizos de asesoramento atenderanse a través de:

• Un formulario web. As consultas realizadas serán respondidas polo letrado/a de garda dentro das 24/48 horas seguintes ao envío da consulta.
• O teléfono 900 121 221. O horario de atención será de luns a venres, en horario de 10:00 a 14:00 horas e de 16:00 a 20:00 horas, e os sábados, de 10:00 a 14:00 horas.

A estes servizos engadeuselle en 2024, o servizo de intermediación en materia de desafiuzamento, de acordo coa Lei 12/2023, do 24 de maio, polo dereito á vivenda, entre grandes posuidores e persoas en risco de perder a súa vivenda, a través do seu Instituto Galego de Mediación e Arbitraxe (INGALMAR) e os colexios da avogacía de Galicia, a través dos seus respectivos servizos de mediación.

No caso de precisar destes servizos de intermediación, deberán dirixirse ao sitio web https://avogacia.gal/servizo-intermediacion/ no que atoparán a forma de contacto e o formulario de iniciación do procedemento. Deberán identificarse con certificado electrónico.

Este convenio estará vixente ata o 31 de decembro do 2025.

O 29.12.2023 publicouse a Lei 10/2023, do 28 de decembro, de medidas fiscais e administrativas (DOG, Núm. 246), que no seu artigo 9 introduce unha modificación da Lei 8/2012, do 29 de xuño, de vivenda de Galicia e engade unha nova disposición adicional vixesimoterceira á Lei 8/2012, do 29 de xuño, de vivenda de Galicia, coa seguinte redacción:

«Disposición adicional vixesimoterceira. Competencia para a emisión dos documentos acreditativos da concorrencia da vulnerabilidade económica previstos nos artigos 439, 655 bis e 685 da Lei 1/2000, do 7 de xaneiro, de axuizamento civil.

Corresponde aos concellos a competencia para a emisión dos documentos acreditativos da concorrencia ou non da vulnerabilidade económica previstos nos artigos 439, 655 bis e 685 da Lei 1/2000, do 7 de xaneiro, de axuizamento civil».