VolverA conselleira de Vivenda e Planificación de Infraestruturas, María Martínez Allegue, informou do inicio das obras dun novo edificio de vivendas protexidas na Parcela C1 de Garabolos, Lugo
A Xunta inicia as obras dun novo inmoble para 76 vivendas de promoción pública en Lugo
O Goberno galego fai un investimento total no edificio de 15,8M€, dos que máis dun 76% son fondos propios
O inmoble, de 76 fogares, disporá de 12 vivendas de 2 dormitorios, 55 de 3 estancias e 9 fogares de 4 dormitorios
Polo menos o 40% das vivendas destinaranse en exclusiva ao alugueiro para menores de 36 anos
A conselleira anuncia que no mes de agosto coñecerase a proposta gañadora do concurso de ideas para a recuperación do entorno do pazo de Dona Urraca
Allegue explicou que a Xunta xa ten en marcha 600 vivendas de promoción pública na cidade, e máis de 2.200 en toda Galicia
- Compartir
-
-
-
Lugo, 18 de xullo de 2025
A conselleira de Vivenda e Planificación de Infraestruturas, María M. Allegue, xunto co secretario xeral de Vivenda e Urbanismo, Heriberto García Porto, anunciou hoxe o inicio das obras dun novo inmoble no barrio lucense de Garabolos, para 76 vivendas de promoción pública. O investimento total no edificio ascende a 15,8M€, dos que máis dun 76% son fondos propios. O inmoble atópase na Parcela C1, na avenida Paulo Fabio Máximo, e dos 76 fogares, 12 vivendas serán de 2 dormitorios, 55 de 3 estancias e 9 fogares de 4 dormitorios. Tamén albergará 76 prazas de garaxes e 76 rochos.
M. Allegue destacou que o novo inmoble “é unha mostra máis do compromiso total do Goberno galego coa cidade de Lugo, cun modelo de cidade sostible e inclusiva, pensado para as persoas, para as familias e para os máis novos”, e anunciou que polo menos o 40% das vivendas destinaranse en exclusiva ao alugueiro para menores de 36 anos.
A conselleira salientou que a Xunta ten en marcha en Lugo 600 vivendas de promoción pública, incluíndo os 50 aloxamentos compartidos e temporais na parcela de Illa Coelleira, e máis de 2.200 en toda Galicia. E salientou que no mes de agosto coñecerase a proposta gañadora para a redacción do plan especial da UI-8 para a recuperación e posta en valor do pazo de Dona Urraca, e a rehabilitación e construción de inmobles no entorno.
M. Allegue resaltou que a Xunta está a traballar ao máximo rendemento para atallar o problema do acceso á vivenda en Lugo e en toda Galicia, en contraposición ao desleixo do Goberno central. A conselleira lamentou que “a Xunta sigue agardando recibir información sobre o novo Plan Estatal de Vivenda para acadar máis fondos, máis recursos e as liñas de traballo para os vindeiros anos”.