Portal IGVS

Santiago de Compostela, 10 de outubro de 2025

A Xunta pon en valor a arquitectura como peza clave para protexer a paisaxe e favorecer o acceso á vivenda. Así o sinalou hoxe a conselleira de Vivenda e Planificación de Infraestruturas, María M. Allegue, que participou na presentación do número 35 da revista Obradoiro por parte do Colexio Oficial de Arquitectos de Galicia.

Allegue, acompañada polo secretario xeral de Vivenda e Urbanismo, Heriberto García Porto, salientou que “esta publicación neste número pon o foco na paisaxe galega, unha riqueza que debemos protexer sumando esforzos entre todos: as administracións, os profesionais e o o conxunto da sociedade”.

Subliñou a liña de colaboración que veñen mantendo a Xunta e o COAG, que está presente en 3 seccións do Observatorio da Vivenda de Galicia: na de Intermediación, na Social e na Técnica.

Remarcou que a Xunta está a traballar en distintas direccións para dar respostas ante o desafío actual da vivenda, apostando pola cooperación público-privada e en colaboración co sector.

Puxo o acento nas licitacións os últimos anos de contratos de redacción de proxectos e dirección de obras por importe de 20M€, que permiten ter agora en marcha preto de 3.000 vivendas de promoción pública; ou na licitación de Proxectos de Interese Autonómico co fin de desenvolver solo residencial para máis de 17.000 vivendas, das 25.000 previstas.

Tamén adiantou que se está traballando na convocatoria de concursos de ideas para a redacción de proxectos de novas promocións de vivendas, incorporando de xeito especial “´técnicas innovadoras” de deseño e configuración das novas edificacións para adaptalas á realidade cambiante dos fogares.

Recordou que a Xunta activou este ano diversas medidas lexislativas e fiscais para promover a construción e rehabilitación de vivendas e incentivar e axilizar os trámites para a súa posta no mercado.